الجواز - محمد فتحى السيد و محمود وحيد

( 1 )
الشاعر محمد فتحى السيد
-----------------
نار فى القلب مع شوقى
وكتير رسايل كتبنا
واقول عاشقك يا معشوقى
إمته ها نكتب كتابنا ؟
--------------
معاك تكمل حياتى
م أنت فى الدنيا نصى
وانت النغم ف واواتى
واجمل حروف نصى
--------------
العيل يعجب ويصاحب
وبيهرب والبنت تبوز
والراجل أخ و 100 صاحب
عشان بيحب ويتجوز
--------------
الجواز ستره لبناتنا
الجواز دا نص دينا
والنسب يربط بينتنا
فى قربنا مين راح يدينا ؟؟؟
-------------
الجواز جنة حياتك
لو تكون حلوه طباعها
و ام تانيه تكون حماتك
وانت ابن تكون تابعها
-------------
محمد فتحى السيد

( 2 )
الشاعر محمود وحيد
-------------
ما عدتش اصدق كلامهم
وعقلى فارقنى وسافر
كرهت اعاتب والومهم
وعايش معاهم باعافر
-------------
أنا بين الخلايق بدر
والطهر ربانى
ذى النسيم فى الفجر
وابويا ربانى
--------------
بنت الاصول دى كتاب
وسطوره عفة وحيا
بتنور الاعتاب
ولكل ضلمة ضيا
-------------
بنت الاصول بتعيش
ع الحلوة والمرة
ترضى بملح وعيش
ولا تشتكى مرة
-------------
بنت الاصول تصبر
حمالة ما تعاتب
ولا عمرها تغدر
لو حتى تتعاتب
------------
بنت الاصول مهرة
والمولى راعيها
فى الدار كما الزهرة
والعطر حاويها
-------------
محمود وحيد