هـوا بحـري
مانيش لاقى ولا كلمة
تكون ماشية على الموضة
بتتمكيج وليها طموح
تكون جايه بحنية
وعاوزه تروح
تغير للقمر شرايين
عشان يسهر علي غنوة
ماهيش لشيرين
أعينها قصيدة شعر في الميادين
تلم الخلق من سينا الي مطروح
بحرف ربيع هواه بحري
يرد الروح
شروطى للوظيفة كتير
تكون الكلمة من عيلة وبنت غفير
معاها بالقليل خالص ليسانس فطير
ولما بحرها يضحك ماتدلعشي
ولا تملا قلل منه
تسيبه يغير
وتبقى خايفة من بكرة وفاتحة
دفترين توفير
تشيل الحظ للثورة
فاتقطع دورة التحرير
فتولد مصر من بطن القصيدة ملاك
يحاسب أيها واحد مكانشي هناك
ويبقي الشعر يابشري و هذا كلام
وفيه الطول
على بحر الهوى الشاعر
وفيه الوزن مش زايد عن المعقول
قصيدة شعر
من فضلةوشوش الناس
بتتعشي مع الباشا
وتعمل برضو غديوة مع الكناس
رحيمة عندها إحساس
ورحمتها ف قول الحق
تعرف امتى تصبح آه
وتعرف امتى تصبح لأ
ولا تهتم بالتشكيل
تخللى الليل مهوش نايم على بعضه
تجيب الصبح بالأحلام
تحط الفكرة ع الفكرة
وتعمل كوم أمل يقدر
يجيب الحب من قدام
تقرب دعوة المظلوم
وتتقدم إلى باب السما تفتح
بدعوة وركعتين لله
تكون يسقط ....تكون يحيا....
تكون صاحية
على باب الوطن واقفة
بتحرس سيرة الشهداء
معاها حجة التضاريس
ووياها عقود ملكية الأهرام
ونهر النيل
وتوب ستي اللي لو هنصونه تطلع منه ألف باريس
انا ابن إيزيس
تكون الآية فى المصحف
وتفسيرها من الإنجيل
ويفهمها بتوع العلم من نظرة
ومن بسمة يفوق العبط والمهابيل
معاها دليل ومن آدم
بإنها واحدة م الأسماء
أبوها كان حديث قدسى
وليها بآية الكرسى نسب وولاء
تكون نادرة تكون قادرة تكون عدرا
تخلف للقيامة مسيح
صوابعها تكون مدهونة بالتسابيح
عشان ساعة أوان الجد
بإيديها تقيم الحد
على شبيحة الأفكار
وتقطع إيد لصوص الفجربالمنشار
وتعلن ع الملأ بكره يا خلق عشار
على سنة كتاب الثورة والميادين
وإن الضحكة كروية
وإن القدس عربية
وإن الصبر مش مفروض
على اللى دراعة ملوية
بإيد شياطين
-----------
حمدي موسى
