حلاوه و ملبس و مشط و شراب
و ضايع بيشحت بكل اكتئاب
و مسك و بخور و حبة عطور
تخلي اللي عجِز في سن الشباب
تسالي يا هانم و منديل يا بيه
و نايم بيحلم برقصة باليه
و عاطل بيكتب على الكرسي همه
و شايب بيحكي زمان كنا ايه
جرايد مصايد لعقل الضعيف
و كام صوره قالعه و منظر لطيف
تحرش بصنعه و ممكن بجاحه
ولا حد ينطق في مشهد سخيف
حياتنا فـ مواصله و وسط الطريق
مؤدب بيسقط و يحيا المُسيء
ضماير عماير في وقت التفاهه
و تحكم بخوفها و تسجن بريء
ده حالنا اللي واصل و طنش تعيش
و نافق تواصل حياه ما تساويش
و فوكك ياعمي ما جاتشي عليك
هتعمل مناضل هتصبح مافيش
---------------------
محمد السيد سعد
