مجـاريـد
---------------------
الشاعر عقوب الشرمي
هو عقوب عبد الغني الشرمي من قبائل اولاد عليرحمه الله وله ثلاثة من الابناء وهم سعد الله وعبد الشفيع واسماعيل شاعر مجيد قال الشعر في جميع الاغراض يتمتع بذاكره وحضور كبيرين ويقطن شاعرنا محافظة الاسكندرية في قرية ابيس ويمتهن حرفة الزاعة وصيد السمك من بحيرة مريوط اطال الله في عمره وامتعه بموفور الصحة والعافية
الشاعر عقوب الشرمي من قبائل اولاد علي التي نزحت الي مصر بعد نزاع مع قبيلة العبيدات بالجبل الاخضر وعرفت حينها بتجريدة حبيب والشاعر عقوب من قبيلة الشرارمة احد فروع الصناقرة من قبيلة اولاد علي والتي تقطن حاليا اقليمي مطروح ومريوط بالاسكندرية والشاعر مقيم اقامة دائمة هناك
قصيدة رثاء ابنه
في عام 1976 توفي ابن الشاعر عقوب الشرمي عن طريق حادث ناتج عن تيار كهربائي وكان عمره وقتذاك اربعة عشر عاما وكذلك كان معه شقيقه عبد الشفيع وخضع عبد الشفيع للعلاج مدة ثمانية اشهر بعد نجاته من التيار الكهربائي فحزن عليهم الشاعرعقوب الشرمي حزنا شديدا ونظم هذة الابيات
الغالي صمل واليوم دونه جوبه ماعاد ايجي كي قبل لا نزهوبه
سمح التوقه ياما اتراب وحيط حطوا فوقه
مولاي رايد بالفراق انضوقه ونا عارفه صابر علي مكتوبه
ومرا الجو يهدا ولها روقه ومرا سماها ينكسى بغبوبه
انظر الجبانه هذي الدنيا مالهاش امانه
واجد اللي معزول من حبانه كان بينهم فارق اوما يدروبه
ومايدوم فيها غير هو سبحانه عادة الدنيا مي مغير النوبه
مايدوم زهاها الدنيا قديمة ع الخراب بناها
راها وراك الموت ماتنساها ياحي لاتجهل انوي ع التوبه
ياما خلايق قبلنا ريناها فاتوا الدنيا عامره منصوبه
صيم وصلي الموت جايه والعمر راه امولي
كم قصر ريته ف البناء متعلي واليوم انفنى ماعاد منه طوبه
اوياما فتى معدول كان ايسلي ريته جنازه في النعش مصلوبه
واجد غيره لاعد انجيبوا للمفارق سيره
اللي دارها مولاي فيها خيره واللي صبّر خفف الله اذنوبه
دمعك حرام ومايجيب بصيره وواجد ابكا ياعين يامغضوبه
واجد ابكاك عليهم واللي فارقوا بالدمع ماجبتيهم
ياعين نامي واغفلي وانسيهم والصبر خير وهو اللي نشقوبه
والله احذايه وين ماتطريهم انحسك معاي اتولعي لهلوبه
انظري لقبوره ياعين خلك ع الفراق صبوره
دمعك عليهم زايدات ابحوره ياما نهيتك تبعيني نوبه
واجد اللي ليام مالن شوره فات العيال وفات حتى ثوبه
يامهبوله واجد اللي ليام وارن زوله
الدنيا قديمه خاينه ملعونه مالك عليها يا العين عتوبه
نحنا عبيد الله ونطيعوله ماعندنا تدبير في مكتوبه
فرد الشاعر غالب بو امطير على هذا الموضوع وقال
اصبر لحكم الله والمكتوبه الصابر اينول اجره بدون حسوبه
الناس ودايع ولانك اللي شاري ولانك بايع
والموت فيها ماهناك شفايع هاضاك كاس داير كلنا نرووبه
خلك عللي صار راضي طايع الصابر الله اينوله مطلوبه
جنات عاليه في اقصور رفايع يوم القيامه والعرب مكروبه
هاضا مبداها الدنيا قديمه ع الخراب ابناها
اصبر وعينك ع البكا انهاها وعارفينه يوم الفراق صعوبه
لوكان البكا ينفع انسيل معاها في كل ساعه نين نبقوا دوبه
غير البكا مايجيب غير عماها وفي لاخره يبقى عليك عقوبه
اصبر لحكم المولى وصبّر اللي تلقاه عنده قوله
عليه العوض فلي توارا زوله وعدا كما معدود يضاروبه
فارس وفي لوطان واخذ صوله احمات العرب يومن اتسير نهوبه
ماعمر من العدوان وطا طوله واخذ اعنايه رايته منصوبه
جنه الغزايات ما صحيوله او لمن امواله من حذاه جلوبه
جاه الخبر حالن اركب شدوله فوق من فرس متيصله ميدوبه
اطلقها وراهم قيس يوم بطوله داروا احصار وكلهم حاطوبه
ضراب رامي غير هم صحيوله امتو مجيله في درب بين انقوبه
جاته رصاصه حاميه معدوله كلنّه اصيود البر ما علموبه
راها الدنيا خاينه ملعونه دير عزم لا تزعل على المنكوبه
فرد عليه الشاعر عقوب الشرمي من جديد وقال
عقوب ياغالب اشوي منسوبه اوتمن مواقيه يجبدن في روبه
اوعقلي شاوي ماعاد القول انطلعه متساوي
الدنيا غروره خاينه ماتاوي تاخذ اللي والديه ما فرحوبه
مولاي مايبيّن عليك فجاوي بجاه من يزوروا فيه ويطوفوبه
اوعقلي خارب وماعاد انريد القول لاني طارب
الهن زمان ماضحكن الا الشوارب الا القلب ذايب كاثرات اعيوبه
وعيني اتحوس على ماني طارب ويجي دمعها نازل غزير اشبوبه
دمعها غرقني ماعاد شاغلني اللي فارقني
فعل الحبايب هو اللي ضايقني وما كان حتى ودنا نشكوبه
يارب يامولاي ياخالقني ان تطلق علينا صبر نداووبه
كل حاجه بامره وماهناك واحد مات ناقص عمره
وراها الظلمه موش كيف القمره او لاحر بؤونه يشابه طوبه
وان كان هي طرّت وراها كمره ولاهي رخا ديمه ولي مكروبه
جفا حباني صاعب عليا هو اللي بكاني
الا الموت حق ومن عليها فاني واللي كل يوم اتسير موش عجوبه
وما انعتب ع الصاحب اللي ماجاني اهناك ناس في الدنيا ومو محسوبه
حلوات البنادم ايكون انساني فزاع زين بصرته وجيوبه
او ما جابلي حاجه اللي عزاني الا جبر خاطر دارته لعروبه
عوضنا علي واحد وماله ثاني نافذ قضاه وكلنا نرضوبه
وافضل القول صلاه ع العدناني اخيار الكلام وهي اللي مطلوبه
يالعين شدي حيلك
قالها الشاعر عقوب الشرمي في رثاء ابنه المرحوم عبد العاطي عقوب الشرمي
يالعين شدي حيلك تنويحك علي غاليك مايقضيلك ان كان تنهدي
يالغضيبه الغالي صمل ماعادابكاك ايجيبه
ماحد ايريد ايجيه غير نصيبه ومتعاندي ربك ارضي تعليلك
انسي الغوالي وراه البكا ساعات مو طوالي
راها الدنيا ماتخلي والي فنّت اجيال من قبلك وتفنى جيلك
انسي طاريه وواجد ابكا ياعين يامدعيه
اوواجد اللي كيفك فقد غاليه وواجد اللي ذاق الفراق مثيلك
ياحنانه واجد اللي مايل عليه زمانه
اوو اجد اللي غيرك فقد حبانه اوو اجد اللي بكيك لو يشكيلك
يالهبيله واجد اللي عزّل وشال رحيله
خالق العمار ومالهن توصيله تعديل ربنا للكون مو تعديلك
انسي الحبايب وانسيه هللي فوقه اتراب وذايب
دمعك امغير عماك ماشي جايب قداك تحمدي ربك ابمو عاطيلك
يالعين اولافك عليك باعدوا وانتي عماك اريافك
اليوم حالتك تصعب على من شافك بعد زهاك بالغالي اطفي قنديلك
من حاش مال زمانك خلك مع ربك شديد ايمانك
وواجد اللي غايب معا حبانك ترضي علي ليام لو نحكيلك
واصبري لحكامه والصبرخير وراه موش ندامه
وعدي الغالي كي اللي قدامه جاري لغيرك هللي جاريلك
يالعين انسيهم وخلك شديدة عزم لا تطريهم
ولولاف ماينفع ابكاك عليهم حتى لو سمرتي دوم طولة ليلك
يالعين اخساره ادموعك عللي جن بعيد ادياره
ماعاد مني تسمعي ادباره ديمه عقاب الليل جاري سيلك
وانسي ريدك ياسه مضى ماعاد ابكاك ايفيدك
يالعين لا بيدي ولاهو بيدك حيرتّي دليل العقل مو فاضيلك
انسي مدعاهم ولاعاد اتجيبيلي سريب غلاهم
وخلك شديدة عزم من يالاهم بالله اصبري وفّيّ عقاب جميلك
رحم الله ابن الشاعر واسكنه فسيح جناته
صعبت علي
التقى شاعرنا عقوب الشرمي بفتاة صغيرة جميلة اراد ان يتحدث اليها فاعرضت عنه لكبر سنه والفارق الذي بينهما فقال
صعبّت عليا قولتك ياسيدي عرفتك رفضتي ماغلاي اتريدي
علي اهزيتي رفضتي سوالي من احذاي مشيتي
بانن امواير كبر منا ريتي مامعاي ودك ف الكلام اتزيدي
اونا كيف فتيني اكثر تنهيدي طلبتي طلب مني اوماهو فيدي
اخرب منقضنا متخاطيين كي لون الزعالا نضنا
وانجيت للحقيقة موش كيف بعضنا نا بلحيتي وانتي اتقول مجيدي
سبحان اللي خلا عزيز قرضنا لليوم وزره قبل كان جريدي
قصيدة سريب الغيه للشاعرين عقوب الشرمي وغالب بومطير
سريب الغيه
قال الشاعر عقوب الشرمي رادا على الشاعر غالب بو امطير عندما اشتكى له من سريب الغيه
غالب شكالي من سريب الغيه اونا لومته عندي صحيح كبيره
نلقانه صاحب عزيز عليا بوعقل وافي زاد عن تحكيره
شكا بجروحه ويريد مني كلمتين نصوحه
جوابا وصلني خانته مفتوحه وين ما قريته بانلي تفسيره
وعقوب في شانه امضحي روحه لازم معاه ايشوفلي تدبيره
نزالتك مقبوله وان شاء ياغالب مناك اطوله
عقوب حرك قوته واسطوله واللي عارضك ناوي علي تدميره
عشما نين ينصرنا عليه المولى اللي حاز ريدك بوقرون غزيره
ومايهمك والي وان شاء ياغالب اطول الغالي
وايبات من لفكار عقلك خالي وعينك تبطل دمعها تقطيره
شورك امضحي عيلتي واموالي تحت الطلب ماعندنا توخيره
وما اطقك غيبه غيت اللي فاضي شرف مي عيبه
المرهون هو اللي واعر عليه الريبه وكيف تقربه تضحك عليك الجيره
حتى ان كان غاليته ايام اتسيبه امفيت العدواه ماتنال بصيره
فرد عليه الشاعر غالب بو امطير وقال
ياعقوب غنيه اللي خاطري منها اخرب ناديه
لوكان فاضيه ماهي بعيد عليه الا مشكلتا واعره وخطيره
نا حاولت ونريدك مساعد ليا عارفينك صاحب ولك تدبيره
اتعد اللوما وعندك شهامه باينه مفهومه
راه صاحبك مشغول شاوي نومه بين الغلا والياس راح دميره
الياس جا سايق مندفع بهجومه علي راس ريدي رافع البنديره
وخش الخلا تومج وشد اعزوما وحالف ان تقسّم لاويه المريره
وناقر طلاقته عليها حوما انريته برم لازم انقص اعميره
ونا امغير انواوي وعقلي اللي وافي اصبّح شاوي
اسباب داي من خزرة عيون الناوي اللي عدله مولاي في تصويره
الها خد في الظلما اتحقا ضاوي وجمه ع المايل اتقول حريره
الها شفايف حمرا ولها ريق يسطل فيه مادة خمره
غلاها سكن جوا اوحلنا ف امره حتى الياس مايقدر علي تضهيره
فرد الشاعر عقوب الشرمي وقال
دز اشاره غالب شكا م الياس والنقارا
اللي حجروا عنه كحيل انظاره وخلو ادموعه نازلات غزيره
قوام بالعجل مني ايريد ادباره جا للقياده بالبيان سفيره
حال غايته يعمل عليهم غاره طالب اجنود ومركبين ذخيره
قلتله امغير الياس شوف مطاره والقط الخارطه هيتلي تصويره
اندز مية طياره ورا طياره ايشيلن جضار الياس من تاثيره
لازم الياس انهدموه احصاره وانجيبوا اللي جرحه قوي تسطيره
ان شاء الله نمحوهن قواعد اجيوش الياس وانهدوهن
ويام الجضر ياصاحبي ننسوهن ويروق لك بالك بعد تعكيره
او نصلوا ديار عزيز وانطولوهن اوترقد مع المرهون فوق سريره
نرسلولك قوه والياس رانا مانهابوا سوه
ولازم انجيبوا بوغثيث املوى اللي اليوم مامنه اتجي تخبيره
الراجل اللي ينفع ايكيد عدوه حتى لو خسر ماله ينال السيره
وفداك مالي كله ولازم انجيب الخايله بالهله
تبقى عيب كي نرقد وهي محتله الصاحب ع الصاحب اطقه غيره
عقوب ماتخطر عليه الذله دون صاحبه يفدا بكل بصيره
ابجيشي جيتك وان شاء الله ياغالب اتهون قضيتك
من اول هجوم انجيبها غاليتك هللي مع العدوان كي اليسيره
وتاخذ مناك اتحوزها في بيتك ربك كريم وماعليه كبيره
قصيدة للشعراء عبد الكريم بوجديدة وعقوب الشرمي وغالب بوامطير
بلا عقل
قال الشاعر عبد الكريم بوجديدة
بلا عقل راه لنسان ماله قيمة حتى المال مايقدر علي تسقيمه
ولاله نيسة ولايبان شي منه علل في قيسه
المقعد مع بوعقل فوق الديسة خير من مساند خينا وكليمه
حتى وهو غني بيته اتقول كنيسه لامقابله سمحه ولا تبسيمه
انجيت قاصدة محتاس له تطليسة ايسبّق اللام اليف والتطريمه
وبوعقل يجبدلك اللي ف الكيسه عند الطلب صاحب عناء وعزيمه
اصحاب العقو ل الزكيات حسيسه الله يدومهم ف الوطن ديمه ديمه
بلا عقل راه لنسان مايصرّف ولاله ثناء مشكور كان اطرّف
بوعقل يحكي كان صار مخرّف وهاضاك يصنت ولا تكليمة
ساكت وكيف اتحتحته يجرّف اتجرّف اطراف البير في تقديمه
ترباس لايعرف ولا يتعرف اتجي اتفهمه تحتار في تفهيمه
بلا عقل راه لنسان ماله هيبه ولا يفرز الزينات كي العطيبه
دمينا غادي وهو ف الصيبه وكي تنكشه تلقاه كي الرميمه
يثوّبن بنانيه امفات اتسيبه تزعم عليك الكبد من تفقيمه
امغير قفيضه لا يدير خير ولايهاب فريضه
مطلوق في دنية الله العريضة بلا مواخذة لكن بلا تشكيمه
حتى الدين موداير عليه فريضة ساقط من التكليف كي البهيمه
فرد الشاعر عقوب الشرمي وقال
بلا عزم ماتقدر ادير بصيره حتى الساهله تبقى عليك كبيره
اعزم بشجاعه اوراك العطيب اتعامله بطباعه
شور الكرم عجّل امشي في ساعه ان ما خسرت مالك ماتنال شكيره
وراه العمر مو دايم قليل متاعه صيوره الحي يموت يبقى سيره
لابد م العيشه بعدها ميته او ما ينطرا لنسان غير بصيته
ودك الراجل كي اتجي في بيته ايلاقيك يشرهب بلا تكشيره
او واجد اللي ماتاكله حريته او لايوم بالزينات يسبق غيره
رقيق الغرض يفرح ان كان عطيته وانجيت تاخذ ماتنول بصيره
البخل مصيبه او را الحي ماياخذ مغير نصيبه
ودك الراجل يختشى في العيبه او ديمه ع الغلبان له تدبيره
واجد اللي بيته عليه الريبه لاينطرا بالزين لا له سيره
مايوم راعيته اخسر من جيبه قرشه اغلا م الروح في تضهيره
ياراجله راه الحي مايطرا الا بفعاله
لاقداك تبخل لاتدير فساله اللي تصرفه يرزق الله بغيره
او حق هللي ضاوي عليك هلاله ما ينغنا مخلوق من تدبيره
خليك صاحب طوله راه الكرم وصى عليه المولى
اوخلي كلامك دايما ف اصوله كي تكون عاقل يقبلوك الجيره
زكاتك ابغير صلاة مي مقبولة واللي فارضة ربك عليك اديره
كون ابجاوي واعزم بشدة عزم واصحا تاوي
راه البخل ماكيفه اهناك بلاوي اللي خالطهماعاد اتجيه ستيره
اوراه الطبع علوه كيف هالعلاوي حاولوه ماقدروا علي تغييره
فوصلت هذة الابيات الي الشاعر الكبير غالب بو امطير وقال
الطبع مايتحول امع الروح ربي خالقه م لول
اهناك ناس مقعدهم اتريده ايطول وهناك ناس ماتقبل لهم تخطيره
اوفيهم اللي يبقى كريم امجول شديد عزم ويقاسم امعاك الميره
افيهم اللي شاقي امغير ايعول غاليه عليه النفس يكره غيره
او مايحب اصحابه او بيته امظلم دوم كي الخرابه
لاضيف يلفى لاعليه نقابه ومبسوط من رايه ومن تفكيره
ويحسب الدنيا جمع مال وصابه ولايريد صيت ولايريد شكيره
هاضاك سيبك منه لاهو ثناء طيب ولاهو جنه
قليل خير ماعنده عليك محنه ان كان جيت ضيف ايسبق التكشيره
او صاحب الكرم تلاقاه واخذ طنه وايرضوا عليه الناس سمح السيره
اهناك واحد خايب امخالف او مايسمع الراي الصايب
كثير الغلط تلقاه ديمه عايب لا ف الرفق ينفع ولا ف الجيره
مايجيب للعيله الا المصايب وفي الهايفه تلقاه له تصديره
اهناك واحد هادي لايجيب عيب ولا يرده عادي
لاهو كرم واجد ولو خرابة نادي متوسط وجاي غطاه دوب حصيره
امفيت العويله والمرا والزادي وابهيماته مايريد بصيره
وفيهم اللي تلقاه راجل عادي ولد ليل وافعاله افعال خطيره
اهناك راجل روحه واهناك راجل ينطرا ف السوحه
واهناك راجل زايدات اميوحه عقله كبير ايفك ف التحسيره
للضيف عنده مندره*مفتوحه قوال خير ويكره التزويره
وجهه بشوش ونفس دوم سموحه ومخلص وكي لون الحليب ضميره
وانت عقلك زاكي او قولك محكر موش دق حناكي
ياعقوب نشكيلك ابنوع مشاكي شاغلاتني منهن ونا في حيره
غيات في خفا منهن الخاطر باكي وان بحت بيهن يفضحن السريره
وان كان قلت ديري يالعين عزاكي تنهال بالبكا خايف اتبات ضريره
قصيدة هناك قول للشاعرين عقوب الشرمي وغالب بومطير
قال الشاعر عقوب الشرمي:
هناك قول يعجبنا ونعترفوبا وهناك قول لا ينفع ولا نشقوبا
هناك قول يسلي ويعجب الخاطر والجضار ايجلي
اللي قايله رايق اوفيه ايفلي صافي امنقى من جميع اعيوبا
كلام المعاني نسمعوه تملي شريطه انشيلوا فيه نحتفظوبا
هناك قول معاني وكل بيت في رسمه احسن م الثاني
كيف نسمعه نطرب ونفتح ذاني ونكرر شريطة 15 نوبة
وهناك قول لاينفع ولا ولاني شريطه عزقته والظنا لعبوبه
هناك قول امنقى مافيه لاكلمه انقولوا لقا
ينباع بدراهم مو بوزن الوقه كيف الذهب مصيون مايدلوبه
اللي قايله نفسي امغير انحقا حتى وهو بعيدانسافروله جوبا
والبيت في بناء لصول ياخذ حقه حتى لو بعد يومين حطوا طوبة
هناك قول له لذيه كيف نسمعه نرتاح ف النفسيه
يجي ع الضلوع امغير كيف الكيه للي عندهم مشكا علاج يداووبه
وهناك قول م المبدا ايسد النيه كيف اللي معا لكمام يلبس ثوبه
هناك قول ابوادي اصحاب الفصاحه والعلل من غادي
اللي يقولك كلمة معا طرادي وان كان تم فيه اعيوب يلتزموبه
ورا القول كيف اللي مشى ف وادي اللي مو خبير يتوه بين ادروبا
هناك قول ايطرب ايوضح المعنى والبعيد ايقرب
كيف من معالج من طبيب امجرب ايخصص دواه ايريحك بسلوبا
اللي يدقن الصنعه يكون امدرب ماقول جاهل في حديث فتوبه
قال الشاعر عبد الكريم بوجدّيدة
ان كان ربنا سهل اتجي مضبوطا سوا ايديرها لافوق والله لوطا
اتجي معدوله اللي يديرها ربك ابكل سهوله
هو بحكمته يعقد اللي محلوله وايفك عقدتا اللي مربوطا
وهللي رجاء ربه رجاه ايطوله واللي حسبها حسبته امغلوطا
اتجي بطربها ولاتقول نعدلها ولا نعكبها
انما كان حاجه ربنا كاتبها ماهناك مشيوله ولا محطوطه
لو كل كي ايطول من يرغبها ان تلقى الدنيا دايره لغلوطا
اتجي بركاحه لاادير شي كثره ابنود نصاحه
والله يافتى ماهناك كي الصراحه او راه الكذب عله والريا ملوطه
فقال الشاعر الكبير عقوب الشرمي
ماحد عدلها بيده اخيار الفتى يصبر لحكمة سيده
هو رازقا عنده ينقصا ويزيده وان كان راد يرخيها وهي مشحوطا
او ما جابها قرباط بتكرميده ان كان شردحت تقطع وهي مربوطا
وان كان ديرت تغلب الخيل الجيده وايجي خيرها داير عليك اخطوطا
ولاخير فيد مقرطا او شديده ولاخير فيد امبذره مفروطا
امحاسب علي بخله وعلي تبديده العاقل عرف خير الامور وسوطا
وان كان ريحها عليت لها تخميده او لا النو مايختم الا بهبوطا
ولايتوه صاحب لصل في تقليده او لا الصافيه تشبه اللي مخلوطا
ونطلب الله يلطف بحال عبيده ابغنوه سببها مايكون اجنوطا
وتبقى العالم في حياه سعيده وان راعي الفقري كيسته ممروطا
وتوبه نقيه مي امغير نقيده وتبقى العالم كلها مبسوطا
ربك ان كان هو راد وايش ايكيده اتخش الغريق ويضهرك من غوطا
قصيدة المقعد مع لجواد للشاعر عقوب الشرمي
المقعد معا لجواد فنطازيه ايجلي جضار العقل يامحلاه
كلامهم ايجي ع البال له لذيه اويخلي المريض ايروق يبره داه
وهناك ناس مقعدهم ايسد النيه ديمه ايذموا في عباد الله
اوراه الرجوله موش بالعديه اهناك لم واجد ما ادير عباه
اهناك واحد غير يسوا ميه نلقوه جاهز وين ماعزناه
والسيره الزينه موش كي الر ديه او ماعمر متشقي يسعده مولاه
الامثال يقولن لصيات يبقن والعمار ايزولن
ايلفن علي لنسان مهما ايطولن واللي ضحك فيهن قريب بكاه
العفن ماتشقابا حتى ان كان دار العيب مايزابا
واللي يدير طيب مايضيع صوابا واللي يحمل مايندم علي حملاه
ولد لصل ماعمره ايبيع اصحابه وان كان درت فيه جميل ماينساه
الناس خلي بالك فيهم اللي يقرب ويدانالك
اوفيهم اللي مايشغلا موالك ومقفل ابواب الحن من يالاه
ومايسال عنك مهما يجرالك واترك الجافي راك تجداه
يبقى حبيبك وين ماتزهالك وان كان ميلت فاتك اخرب مدعاه
ماعد ايجيك و لايقول ايش حالك ايبعك اقبال الناس بيعة شاه
ياصاحبي نوصيك خلي بالك راه الصبر ماكيف ولا منجاه
انريدوك ياغالب اتحط اقوالك واتكمل القول اللي احنا قلناه
اليوم صاحبك عقوب راه شكالك طالب الفزع منك ولا تنساه
ورد عليه او سمّع اصحابي كلهم جملية
ابقولك اللي كي قول لهلالية واللي معنا يعرفوا معناه
قولك ايجي ميزون مية ميه لايزيد لاينقص بعد قسناه
طالبين كلامك الناس الفهايم هاللي قدامك
احكيلهم عللي ريتا في ايامك واجبد اللي متروك وانسيناه
عد الملام ولومت اللي لامك وهيت العلل تفصيل من مبداه
قول قول عداله وراه كل واحد ينطرا بفعاله
انريدك اتجيب طبايع الرجاله الزين اشكره وللعفن دير عزاه
اخيار الفتى ودك ايطول باله ولاخير في وجهن يطير نداه
قصيدة الزين زين للشاعر عقوب الشرمي
الزين زين واحنا انريدوه الزين سمح والسعر غالي
او ما عندنا بيش نصلوه ارقاق عزم والجيب خالي
ايريد مال واحنا انضحوه اوما انخيبوا ظن والي
ويريد عزم وندا في لوجوه بلا هذين ماصيت عالي
ورا الحق موش متيوه ماينكرا غير الضلالي
بو عقل بالقول حيوه وخلوا ادياره عوالي
اللي كيف نعتازوا انجوه كما الظل وان القبالي
بديت قول وانتوا اتوفوه يا اجواد ردوا اسوالي
فرد عليه الشاعر عبد الكريم بوجديّدة وقال
الزين زين ومافيه مكروه من تاريخ لجيال الخوالي
والمال سمح غير مشبوه ودي فيه نبدا اقوالي
ايريد زول بالخير منبوه كي البير واسع الجوالي
وان طب فيد شخص منجوه قليل اصل يبقا ايصالي
ويريد صيت والناس يطروه كيف قارعين الطبالي
واللي خير مانقصدوه هو اللي مولى الموالي
جميع مقصدي فيه هو في راحتي وانشغالي
واللي عندهم راي يبدوه ونا جبت مافي اشوالي
مساجلة شعرية بين الشاعرين عقوب الشرمي وعبد الكريم
قال الشاعر عبد الكريم بوجدّيدة
ان كان ربنا سهل اتجي مضبوطا سوا ايديرها لافوق والله لوطا
اتجي معدوله اللي يديرها ربك ابكل سهوله
هو بحكمته يعقد اللي محلوله وايفك عقدتا اللي مربوطا
وهللي رجاء ربه رجاهى ايطوله واللي حسبها حسبته امغلوطا
اتجي بطربها ولاتقول نعدلها ولا نعكبها
انما كان حاجه ربنا كاتبها ماهناك مشيوله ولا محطوطه
لو كل كي ايطول من يرغبها ان تلقى الدنيا دايره لغلوطا
اتجي بركاحه لاادير شي كثره ابنود نصاحه
والله يافتى ماهناك كي الصراحه او راه الكذب عله والريا ملوطه
فقال الشاعر الكبير عقوب الشرمي
ماحد عدلها بيده اخيار الفتى يصبر لحكمة سيده
هو رازقا عنده ينقصا ويزيده وان كان راد يرخيها وهي مشحوطا
او ما جابها قرباط بتكرميده ان كان شردحت تقطع وهي مربوطا
وان كان ديرت تغلب الخيل الجيده وايجي خيرها داير عليك اخطوطا
ولاخير فيد مقرطا او شديده ولاخير فيد امبذره مفروطا
امحاسب علي بخله وعلي تبديده العاقل عرف خير الامور وسوطا
وان كان ريحها عليت لها تخميده او لا النو مايختم الا بهبوطا
ولايتوه صاحب لصل في تقليده او لا الصافيه تشبه اللي مخلوطا
ونطلب الله يلطف بحال عبيده ابغنوه سببها مايكون اجنوطا
وتبقى العالم في حياه سعيده وان راعي الفقري كيسته ممروطا
وتوبه نقيه مي امغير نقيده وتبقى العالم كلها مبسوطا
ربك ان كان هو راد وايش ايكيده اتخش الغريق ويضهرك من غوطا
يالعين ياالهبيله
يالعين يا الهبيلة دمعك علي لولاف موش وسيله امغير تنعمي
يالعين هدي روعك بلا فقفه كفي شوي ادموعك
واجد اللي جاريلهم ميضوعك كان الهنى ساكب عليهم سيله
باتوا اصبّح نوحهم كي نوعك تحطم غلاهم بين يوم وليله
امغير اتلالي لايوم لاساعه الا طوالي
العين بارحه ماعد قنعها والي راحت هفا تمت اليوم عليله
داريتها قالت حديث هلالي حيالتها مابت اتخيل الحيله
امغير اذرف تيار دمعها داير اسيول ايجرف
انسمعت على واحد اشوي مطرف فيسع اتنوض امقنية تمشيله
وكل من اتقابل عن عزيز اتخرف صاحب سواء والله عدو تشكيله
امغير اتهاتي بطاري عزيز اتحوس وان مباتي
العين دمعها تيار ديما واتي اتخّمد مواقيها يذرّف سيله
تمت اتنوّح برجلت راياتي واعر مرضها مادوا لاقيله
ولالها تخبيره امفيت ما علي خزرة اعيون الطيره
بطول الرجا مابت اتغالي غيره جزاّها علي لخرين روعة جيله
مولى السوالف هالبات ضميره خلّف غلا واعر اصعب تبديله
ولالها تخريفه امفيت ماعلي غيّت جميل الصيفه
حد الفزع وقتن ايجيها طيفه تفتح حواجز دمعها وتهيله
انقول اتركي مدعاه واجد كيفه يضيق علمها حتى التراب اتشيله
يالعين واجد مرك ساعه علي ساعه ابكاك ايضرك
انتي السبب ياعين كله جرك منك امراض العقل وتبهديله
ياما تحوّل يتقي في شرك جنة غلا بالكذب صورتيله
يالعين موش ادباره تسكيبك ع اللي جن بعيد ادياره
امغير اصبري يمكن اتهاود ناره والله يعاود كيف قبل ازويله
مولى الشعر مجدول له نصفاره بوعين ترزي ساعة التسبيله
بوخد يضاوا كما النذاره مولى الشفايف شهد في تحليله
بو ثغر باسم زاهيات انواره جنه علي ضقات مجرى نيله
بو وسط متساوي معا كيماره علي ظهرة الدنيا قليل مثيله
تما بعيد اليوم حيزّت داره لايقدر ايجيني ولا نمشيله
ما ايجيب شي دمعك كحيل انظاره حتى لو بكيتي مية يوم بليله
ياعين خلك ع الجفا صباره را الصبر ماكيفه اهناك فضيله
وهذي الدنيا خاينه غداره كل يوم في حاله وفي تشكيله
ياتي جدب يبقى ايثوب عفاره والمزن يمنع ع الوطا نزيله
ويهبّن قبالي دايرات حراره شين صهدهن في ساعة التقييله
ايصيف الربيع وينطفى نواره ولاهناك قحوانه ولا زغليله*
كثر الجدب نزّح غزير ابياره دردي عقاب اميته وقليله
يبقوا العالم دايخين سكاره ولاصحّت زراعه ولا تمويله
ايقضّوا العام بطول في نزراره اللي ماصبر عزّل وساق رحيله
غونن جفاه الوطن سيّب داره جاير عليه الوقت مو من جيله
وقتن اسقد وادعوه اجواره سيبهم وعدا لحال سبيله
مدوا النظر في جرته بمراره خلّف شاغلة بال وتزلويله
عاد يدرسوا مابت اتصح ادباره باتوا يوتوا ناويين الشيله
ناض رحلهم ساعة صلاة افجاره مازول منهم له هدف ماشيله
قاصدين من عالم جميع اسراره محال مايقطع احبال وصيله
سبحان مولانا عظيم اقداره خالق الكون وحر في تعديله
اتراجع ايسوق المزن غيم امطاره والوطن يزهزه بعد تخبيله
واتراعي العلاوي سيلهن يجارا وايعود الربيع بنسمته العليله
ويرد كل واحد علي موكاره امغير اصبري مللي لها تعديله
انتم انحايل وهي مطوبسه لاكن الماقي سايل
امحوننه علي طاري عزيز ولايل اتريد الكلام ايسير واتناييله
بوسط في لبس الحياصه** خايل حبه ذراه خلا العيون ذبيله
يالعين يالهبيله دمعك علي لولاف موش وسيله امغير تنعمي
اكبرنا تمينا شياب للشاعرين عقوب الشرمي وغالب بو امطير
اكبرنا تمينا شياب للشاعرين عقوب الشرمي وغالب بو امطير
وسبب هذة القصيدة عندما تقدمت السن بالشاعرين المرحوم غالب بو امطير والشاعر عقوب الشرمي اطال الله في عمره ووصلوا الي سن الخمسين واصبحوا كبار على الحب ومغازلة الفتيات كسابق عهدهم واصبح فارق العمر كبير بينهم الفتيات اللاتي فسي سن بناتهم
قال الشاعر المرحوم غالب بو امطير
اكبرنا تمينا شياب وعقلي تاب علي غيت مجلي الانياب
اكبرنا طقّر فينا شيب وتبقى عيب اجيبوا للغيات سريب
ابقي لنا لياس طبيب علاجه جاب نفع ماعد عندي شخشاب
فلما وصلت هذة الابيات الي الشاعر الكبير عقوب عبد الغني الشرمي قال
اكبرنا قولوا للزينين وتم ضنين اخطور غلا ضاوي الجبين
اللي عمره فوق الخمسين ايقولوا عاب اندار مع وحده سلهاب
اصوله يبقى م العاقلين عليه احساب وماله ف الغيات مناب
اكبرنا بكفايه ماصار انسيت الكار وتميت رزين وصبار
انخطم بو دملج وسوار انرد الباب ونمسكلي سبحه وكتاب
خذينا ف الغيه مشوار معا لحباب انريدوا منهم رد اتعاب
اكبرنا وانسيت الغيات بعد شيبات نقيده كي نطري البنات
امعاهن مالي سهريات انريت شباب انطبس ونواطي لشناب
زمان الغيه راح وفات ابقيت انهاب قساميي ف الزين اصعاب
كبرنا ماعد لنا فيه سريب الغيات انسيناه
الشايب مو امحلاك اوجيه انكان اغوي قدام ضناه
الناس اتقول عليه سفيه بعد كبرا ياحول الله
العاقل كيف الشيب ايجيه ايهوّد ويغير ممشاه
ولكن عقلي واحل فيه ايحوس عليا كي ننهاه
قديم الغيات امرديه امغير ايموج كابر داه
ايزازي من نار غواليه وجسمه ذاب اضايق مو طايق لثياب
اكبرنا ياخوتي بالحيل نسيت غلا ضاوي الجبين
انسيت غلا لاوي المنديل بعد غيات امعاه اسنين
انشد نحكيلك بالتفصيل علي غيت مكحول العين
غلاهم عندي له تسجيل اول عام اثنين وخمسين
انشد نحيلك بالتفصيل علي غيت ضاوي الجبين
تلاقينا من غير دليل نشدني قال لفيت منين
حصلي ف الراس اتبرجيل اكثر تفكيري والتخمين
وثاني يوم حصل تاويل توافقنا نحنا الاثنين
وتمينا كي المساطيل اغوينا والغاوي مسكين
بعد صارن هالمواويل برم لياس قليل الدين
اجرون غلانا جاهن سيل كنسهن ماعقب غمرين
بعد صابا هفنا م الكيل الله يجعلنا م الصابرين
مرادي حازوها العويل ونا تميت اتقول حزين
الغيات زها وتبهديل شقا وعذاب اخسارتن ساعة الحساب
فرد علية الشاعر المرحوم غالب بوامطيروقال
اكبرنا قبل انريد انتوب لقيت عقوب جبد مدعا منقوش الثوب
اللي حبه ذوبني ذوب فتحلي باب انهان لنظار الخياب
الغالي دونه ياس نحوب وناقر باب انخطر ملقاهم ونهاب
عقوب شكالي عن مطراه وجر غلاه اللي صار وماتم وفاه
جحد ماصحت لمذاراه اسنين اصعاب قضاهن في مرجى غياب
قديم الغيه يخطر راه ابدون اسباب اللي يقول انسيته كذاب
اكبرنا عن غيات اليوم امغير الماضي ماننسوه
اعيون اللي ع الصيد ايحوم انروقوا وقتن مانطروه
انحنوله كيف المفطوم اللي عن ثدي امه اعزلوه
الغالي لباس المكعوم انموتوا موت وما ننسوه
عقوب ان كان شكا مظلوم ايشيلوا وزر اللي لاموه
ايصهد لازاد ولانوم اللي راعوا حاله اقرضوه
سمّر ف الليل ايعد انجوم ويطلب في عون وفي بوه
ايراجي في عداد اللوم رجا ماجاب وهو دمعه نازل سكاب
اكبرنا تمينا شياب وعقلي تاب علي غيت مجلي الانياب
قصيدة حوه للشاعرين عبد الرحمن بوامغيب وعقوب الشرمي
ابتداءها الشاعر عبد الرحمن بو مغّيب وقال
مهانكشي مشكل الا من حوه سواء كان في ما فات والله توا
عندي عليهن غنه وكانن اسباب اخروجنا م الجنة
اصويحبات يوسف هن اللي احبسنه اسنين في زنانزن مصر حاصل جوا
وحصحص الحق وهن اللي خرجنه كفاه شركن وانتن خذيتن سوا
وقد عرض الشاعر عبد الرحمن بو مغيب تلك الابيات على الشاعر الكبير عقوب الشرمي فقال
راحت علينا ليل لولا حوه لاكان بيت ولاطعام اسوا
فيهن اعيوب اكبار ولهن عوزه سبحان من خلق ف الكون زوج وزوجه
وتلقى الشايب كي اتغيب عجوزه ايشين منظره تقلب امعاه الدوه
وتلقاه متخوخم ولاوي بوزه كيف المريض اللي معاه حموه
الهن تمييله وديما ايجي منهن خراب العيله
منعولات هن وابليس مية نعيله اصحاب كيد كي كيد العدو لعدوه
ان تبعتن يومك اسود من ليله وان خالفتن شعشع نهارك ضوا
سود انياهن لاخير فيهن لاحياه بلاهن
ودامينك قادر اتعيش امعاهن واتهون وينما تبقى قليل امروه
لاتنشغل بيهن او لا تنساهن عبرهن الا ماعون فيه افروه
انعاشرتن لازم ايبان اخياهن كيمن بناله بيت تحتا هوه
ولاتقول غلابه كم نجع عامر هن اسباب خرابه
كي امشير تلقاهن الهن نقلابه حتى ان روقّن لازم ايديرن نوا
اللي يريد راحتن ايبيع اصحابه قديم كيدهن حتى معا النبوه
قصيدة الراجل بلا مال للشاعرين عبد الرحمن بومغيب الصنقري وعقوب الشرمي
ابتداءها الشاعر عبد الرحمن بومغيّب وقال
مايعلم الكذب والذل وبعدك علي من اتريده
الا خلو ليدين والقل يخلف مشاكل عديده
لاتزور صاحب ولااطل ولا لك عزومه شديده
ولاعاد تربط ولاتحل وحكيك عليهن نقيده
فقال الشاعر عقوب الشرمي
الراجل بلا مال ينذل وحتى الضنينه اتكيده
ايجازف ايريد يفعل ويلقى اظروفه شديده
وينسوه لصحاب والهل ومايجوه في يوم عيده
او لا يقبلوله علل لو تم بوزيد سيده
ايعافوه ويقولوا هبل وهو راه ماهو قعيده
ولايطول مقعد الظل الا بو عبايع جديده
الفقري يبات ف الطل وبو مال يبقوا عبيده
ويبقى الكل ف الكل او هو راه مايحق البعيده
امعا الماده ضاع لصل وكثروا اقلال العقيده
ويبان فرق لصار الشكل واللي يفوز راعي الجيده
اوصاحب الكديشه* ايكل مشوارين والنجهه اتصيده
ساعات بومال ينذل ويجيب الفخر بو حديده
نا انقول غير اللي حصل ولا ننقصا لا نزيده
اييدوه بوعقل منخل ان كان تم واجد رصيده
بوراس كي راس البغل اللي ماكلامك ايصيده
او تلقاه ديمه فحل امغير كي حمار الحصيده
اللي معاه ف الوكل ينغل وهابتين كي يلقى عصيده
وانجا الكرب لونه ايدل ايفوت صاحبه ما يفيده
اخيار الكلام اقل وادل وهذا ختام القصيده
ونصلي علي من اوصل وزار العرش في ليله سعيده
نبينا اللي ما له مثل مشهور بالاخلاق الحميده
مازلت نا هو نا للشاعر عقوب الشرمي
ملحمة( مازلت نا هو نا) كما نعلم جميعا ابتدائها شاعرنا الكبير بوعجيلة عبد السلام وقد نظم على منوالها كثير منهم على سبيل المثال لاالحصر عبد السلام بوجلاوي وعلي الساعدي وعبد الله بو الروين ومفتاح الفالح وغيرهم الي ان وصلت الي شعرائنا في اقليم مطروح بمصر فنظم عليها الشاعر الكبير عبد الرحمن بو امغيب الصنقري ابيات في غاية الروعه وقد قمنا بنشرها لكم ومن ثم وصلت الابيات التي قالها الشاعر بومغيّب الي شاعرنا الكبير عقوب الشرمي اطال الله في عمره وامتعه بموفور الصحة والعافية فنظم ابيات يسرني ان اقدمها لكم علها تنال رضاكم واستحسانكم وفقني الله واياكم الي مافية الخير وان يجعل عملنا هذا خالصا لوجهه الكريم فقال
اسمعنا شريط وفيه قول ارحومه*
كلامه اعلاج وللمريض دوا
جميع من اسمع بوداد حط اختومه
لاايعارض لايقول خطا
مايطّلع الكلمة اللي مذمومه
بوداد زين اللفظ كان حكا
او كمان خوه من غادي ايعد اللومه
ماايرد ع الطالب بقولت لا
العمده شهير او سيرته مفهومه
الله يرحمه راجل قليل افدا
ان قال الكلام اتايده الحكومة
وفوق من قراره يختموا القضا
ان شاء الله في قبره هني في نومه
تدعيله العالم كل وان صلا
لاكن الدنيا ما عليها لومه
ما ادوم للانسان دار فنا
اومازلت مالي رده
اومازلت نفزع عند وقت الشده
او مازال في قلبي صفا وموده
وانحايل ع اليتيم كان بكا
ساس المحنه ماانريد انهده
وانحمل صاحبي حتى ان كان جفا
او عمر الجفا ماتم كي الموده
اوربك خلق لطباع موش سوا
اومازلت نا صبار
او مازلت نتقّى انريد عمار
او نبقى انطفي كي اتشيط النار
وانكافي اصحاب العيب بالحملا
او ياما اشربنا ف الزمان امرار
او ياما اضحكنا في ايام زها
هذا خبر ريته صحيح وصار
وارحومه حكابه ف الكلام بدا
ارحومه كلامه موعضة ووقار
ارحومه امعلم ما ايريد وصا
اومازلت ما نذارا
والضيف نعرف واجبه واقدارا
او نشكر اصحاب العرف والشعارا
في كل يوم وكل ليل مسا
اومازلت نا كي قبل م الصبارا
وبفعل العطيبه ما انريد اكفا
او مازلت صاحب جونه
او جاري انخاف عليه نوقف دونه
وانعامل العالم كل لون بلونه
او ما القيت كيف الصبر باب نجا
اولانقص عندي ف الرفق لاخونه
صاحب صداقا كامله بوفا
مازلت في معدالي
ومازال طبعي كيف قبل وتالي
اومازلت ع العايب انطّول بالي
كنيب ايتندم ويهديه الله
اهناك ناس هاديهم الله العالي
واهناك ناس من غادي اوجوه شقا
افيهم اللي مغضوب عقلا دالي
لايفيد صاحب لايكيد اعدا
اوفيهم اللي تلقاه كي الهلالي
يخبربك طريق الخير في الظلما
مازلت نا كي قبل
او مازلت ماودي انكر الحبل
او لاخير ف اللي يعتبوا ع الهبل
واللي لااجوّل لامشا لاجا
اللي مايبانوا يوم دق الطبل
فزعهم امغير اعياط كي النسا
منحاش جا بولبده *ابتاع الزبل
علي وطنا عيط وادير عزا
نفسي انشوف الخيل وامراح ابل
او نفسي انراعي وطن فيه اعلا
اومازلت كيف زمان
او نكره اللي كذاب والفتان
وانصاحبت صاحب ماعليا هان
اوكل يوم في قلبي ايزيد غلا
او لاخير في راجل طويل السان
وجابد سريب الناس كل ضحا
غالي علي البر والوديان
او نجع البوادي في اوطان خلا
رجاله عصارا صيدهم غزلان
والله طير الحباره امعا قطا
لاعندهم ناموس لاذبان
او اديوك م البيضا اتجيب الدا
وانجاهم الضيف ايذبّحوا خرفان
هاضول ناس من غادي اصحاب عنا
وسلامي علي لجواد والفرسان
اعداد ماقرا قاري كتاب تلا
واخيار الكلام صلاه ع العدنان
وهي الفايده نختم القول ابها
قصيدة يا صاحبي للشاعر عقوب الشرمي
هذة القصيده لشاعرنا الكبير عقوب الشرمي وارسل بتلك الابيات الي الشاعر المرحوم غالب مطير فرد الشاعر غالب امطير بابيات جميله سنوردها مع هذه القصيدة
ياصاحبي خذلك كلام نصوحه والله ماعطيب البخت يسعد روحه
كل حاجه بامره اللي خالق الظلمه وخالق قمره
رزق لبنادم قارنه في عمره ماضي عليه وكاتبه في لوحه
مره الحظ يبقى حلو كيف التمره ومرات يبقى شين فيه ملوحه
مو بالحيله ولاحد شريك الله في تعديله
مره تنعدل مره لها تمييله مابت علي حاله ادوم ركوحه
الدنيا اتغير بين يوم وليله اتجيبلك اللي جوبه ومو ف السوحه
وين ما تزهالك اتجيبلك اللي مي خاطره في بالك
وكي تنعكس راها اتوقف حالك مع كل باب اديرلك فاتوحه
مره تملا من خزاين مالك ومرات ماتكسب ولا مذبوحه
كلا ساير من غير مانوصيك مانك باير
الراجل اللي يفهم وعايش داير يرضى بالقليل ايقولك مربوحه
خذ كلام منقه ميزون بالميزان واخذ حقه
الايام عادتن رضا ومشقه وماهناك علوه ولا الها دردوحه
واجد اللي فيها اعلي وترقى وطاح نين تمت رقبته ملووحه
خذ كلام ايفيدك ومتنال غير اللي كتبها سيدك
وان جاورت جار عطيب راه ايكيدك وبوعقل ما يجسر ع المفضوحه
وكلمة العاقل تعجبك وتفيدك كي طعمة النعناع والها فوحه
ونا قلت قولي وانت فسر بيدك عقلك بحر طامي قليل انزوحه
لاتكون قلولي خلي اتكالك ع الكريم الفوقي
عالم اللي كاميه في صندوقي وعالم بسر الناس قبل اتبوحه
وعالم اللي فارق وهو في شوقي نفذّت رادته رايد الله ابوحه
فعندما وصلت تلك الابيات إلي الشاعر الكبير المرحوم غالب بو امطير رد وقال:
جوابك جاني توعيض للي يفهموا المعاني
هي فانيه واللي عليها فاني كيف حوشة الميجود كيف اسروحه
ماحد ايدير اجيوب في لكفاني اللي يموت يترك كسوته مسلوحه
ايام اتطري وايام ريحها قبلي عجاج ايذري
الدنيا المتكسي بها متعري وواجب اتعامل كل حد بميوحه
وراه الصبرماكيفه علاج ايبري للي ظالمه وقته وذايح ذوحه
ايام تروق اتجيبلك اللي تبقى الهن متشوق
مرا تنعكس ومرا عليك اتفوق مالها مثيل الا على الدرجوحه
مرا ينعكس مرا يجي متزوق زمان شين مايابه ايدوم افروحه
دير احسابك وخلي الناس حبايبك واصحابك
في وجه ضيفك لاتسكر بابك وصلي صلاة الفجر عند اللوحه
يوم القيامه فيه نشر كتابك يحاسبوا اللي ناطح على المنطوحه
مازلت نا هو نا للشاعر عبد الرحمن بو امغيب الصنقري
مازلت نا هو نا ساس الحيا نبني عليه ابنا نظيف معدني
مازلت لك حمال
ومازال في عقلي عليك دلال
ومازلت واخذ في قولة قال
ومازلت مانخدم امفيت ابها
ومازلت تقلب كل يوم بحال
ومازال عندي فيكباب رجا
مازلت نا القديم
صاحب الجفا نقدر عليه انصيم
لاعيب لاسيات لاتحريم
لامعاتبه لاحس لاضوضا
ولا ليش لا كنك ولاتكليم
كثر الحديث ايسير فيه خطا
ولانريد نفتح باب سين وجيم
ولاخير ف الصاحب ان كان شكا
خزازين عقلي نين دارن ريم
من كثر السوايا طافحات منا
صابر ونراجي في رجا الكريم
يمكن اللي دردي اتعود صفا
مازلت كي ماكنت
لابعت صاحب لاصديقي خنت
نظيف الصداقة كان نا قارنت
من غير عله خالصه بوفا
وننشد لوجه الله كان نشدت
علي صاحبي حتى ان كان جفا
ومازلت نقفزلك بعد ما تقت
لانريد شكر ولانريد ثنا
ومازلت نبذل كل ماكونت
ومازلت نفرح للغريب ان جا
ونضيف الضايف لو عشا شحتت
انبات في مسره كامله وهنا
مضغاتني ليام نين ابطلت
وعندي ملاها والفراغ سوا
وكثر رفق لجواد منها خذت
امبادي بدينا بالحياه ابها
رصيدي قوي ومازلت مسع لنت
وغنا النفس ماكيفه اهناك اغنا
وكلمة الحق انقولها لوكنت
بين المشانق والسيوف احما
متمسك علي مبدا وبيه امنت
حتى وهن اظروفي هكذي وكذا
واصحاب المظاهر والنفاق اكرهت
دساسة الدسايس والوجوه اقوا
ووجهم اتقول اكداس طول الوقت
من كثر المعاصي شايلات صدا
كرارة احبال كبار فيهم دخت
وقلة ضمير وفشخره وريا
وان سالوك ماليله هنيه بتت
وان سلتم ماعد خلاصك جا
وان طالبتهم تبقى اتقول اغلطت
تاخذ كريهه سنه رد اكفا
يغفرلي الله ان فيهم خضت
علي عد مامنهم لحظت اخطا
الله يبعد الشيطان واستغفرت
مغير للنذاله مالقيت وعا
الله ينعلك يا ابليس وين حضرت
واينعل اللي كيفك سوا بسوا
وصلي ع الهادي واقول امنت
رب الخليقه واطلبوا الهدا
مازلت نا هو نا ساس الحيا نبني عليه ابنا نظيف معدني
مازلت نا هو نا علي كبر سني عفن في اخطا امغير بينا
مازلت موش تمام
ومازلت خاطي في بعض لحكام
قليل وين ماناقف ورا الامام
وقليل وين ما نوعا الفجر قرا
وقليل وين مانزعل علي الاسلام
وقليل وين دمعي ع الخدود جرا
شباب الحجاره جابهم الاعلام
الواحد اهدومه غارقات ادما
ولاجابني شايب كبير انظام
ولامشاعري حرك صريخ انسا
وقصة الدره فلم م الافلام
وواجد مثيله مانباهم جا
قاعد وانصنت انريد سلام
قابيتني جاهل وفي غبا
القدس راه مايجيبه مضيغ كلام
ايريد يوم دخانه اتقول ندا
ياربنا ياملك ياعلام
ان تنصر الحق الظلم راه طغا
امغير بينا مازلت نا هو نا علي كبر سني عفن في اخطا
----------------------------------
المصدر/ موقع ليبيا جيل
أعداد / الباحث الأستاذ أحمد الحوتي جزاه الله كل خير
